阿仔半夜久咳(2Y2M-3Y1M), 霉菌? 肺弱? 終於搵啱醫生, 經歷分享及 8個健康心得 (18年4月28日更新)

咳左將近半年(半夜咳)。終於好番,原因原來係霉菌。
小朋友夜咳好困擾,特別係一晚咳醒幾次的話,無論大人細路都瞓得唔好
18年4月28日更新:係17年4月尾,轉入夏天後,呀仔既夜咳好番哂。原來唔關霉菌事,係天氣同體質問題。

----
大多細路都易咳,特別係番左幼稚園之後,d菌傳黎傳去。我呀仔,亦咳左將近半年 (半夜咳)。終於好番,多得搵到個好醫生。之前呀仔夜咳時 真係好徬徨,所以寫本文希望可以幫到人。
  • 本文會先講下經歷,再講下最後搵啱一個中醫,最後講下睇左咁多中西醫生既健康心得
  • 我覺得好既(中/西)醫生我會特別講明,或者有咩問題,你都可以留言,或者直接聯絡我。

每晚半夜咳 近半年都唔好 睇左 5, 6 次中西醫生

約 16年 10月底 (2Y2M) : 夜咳遍尋中西醫不果

阿仔感冒完左之後,每晚半夜咳,咳醒 2-3 次,每次連續咳 10-20 秒左右,冇乜痰既,亦會繼續瞓番。跑步一陣亦都會氣喘咳。但日間咳就好少,只有一聲半聲。見日間冇點咳,諗住食中藥調理下。

睇咗 3個中醫 (尖沙咀,太子, 石塘咀) 1個西醫 都冇效,中醫話佢肺弱,食咗好多中藥、猴棗散,保嬰單,都冇好轉,都係每晚咳醒幾次,好在日頭冇點咳。

約 17年 1月底 (2Y5M) : 開始聞哮喘藥但唔斷尾

見半夜咳咗成兩三個月啦,再睇 兒科西醫(美孚)話氣管敏感,開青蛙仔 (氣管敏感藥 Singulair),食左一星期冇效所以停葯,轉睇一 成人胸肺科醫生 (之後先知青蛙仔要食 3星期先見效)。
胸肺科醫生 比佢聞氣 (哮喘病人聞果類,見圖),兩支,一支藍色 (擴張氣管),一支橙色 (有類固醇, 抗敏感)。幾日後開始冇咳,聞左兩星期,減藥量,又咳返,比之前咳多左添,最嚴重果時一晚咳醒三四次。[類固醇唔可以長期聞,醫生話可能會減慢發育]
胸肺科醫生比佢聞氣(哮喘病人聞果類)
胸肺科醫生開的抗氣管敏感噴劑

兒童氣管專科好醫生:「病因可能係霉菌」

17年3月中旬 (2Y7M) : 轉醫生終於停咳

輾轉搵到一個 兒童氣管專科醫生 (好好人,好細心),開藥同胸肺科一樣,但劑量較輕 (For 小朋友,原來之前開既係大人分量!)。佢開既劑量,話有研究可以長期聞冇副作用,係之前胸肺科量既 1/4。睇哂阿仔耳鼻喉,聽埋肺都冇事,安心d。

我問點解咳,佢話氣管敏感,佢問近親有冇過敏體質 (食物、藥物敏感、濕疹等),但我同太太都冇。我問係咪塵蟎,佢話可能係 (我其實晒過床褥)。另佢話有病人床邊牆有霉菌(見下圖) 而咳,搬屋後就好左。呢個真係黎睇佢既最大得著。


牆身發霉原來有可能引起呼吸道疾病
我家小朋友床邊既牆,就係有呢d咁既霉點,快d睇下你屋企有冇?
回家後看床邊牆身真有輕微發霉,即刻清潔好 (用酒精抺,再加「防霉勇士」再抺),聞左氣一星期,夜咳逐漸減少,一星期後冇再咳啦。

我計一計條數,十月停冷氣 (冷氣有助抽濕, 停冷氣所以霉菌就黎) 就開始咳,4月夏天開番冷氣就唔咳 (開番冷氣抽濕霉菌減少)。。。仲唔係關霉菌事 ?  
但原來只係暫時唔咳, 夜咳根本唔關霉菌事, 另外, 其實冷氣制冷模式, 其實應該唔去濕唔減到霉的
17年 4月中旬 (2Y8M) : 停藥又咳番 試身體過敏反應 點知停聞氣管藥約一星期,呀仔又咳番!明明於是再睇另一個兒童氣管科專科醫生 (都係由將軍澳既兒科醫生介紹),又有兩點新發現:
  1. 原來有測試可看有否塵蟎過敏。呀仔試左,冇野喎。
  2. 佢話有 d細路會咁樣咳,咳到 5-6歲。。。   
19年5月上旬 (4Y8M) update: 好彩冇咳到 5, 6 歲,都依家再冇持續夜咳啦,偶有夜咳幾晚,我就執番 吉醫師 (超級好人中醫, 好細心, 醫術好, 見 3Y1M) 啲藥方,再唔得就去搵佢,食幾劑次次都好


冬天咳 夏天好 每年復

17年5月初 (2Y9M) : 夏天到 夜咳好 排瑪麗兒童哮喘科

轉入夏天天氣轉暖後,呀仔既夜咳自自然然完全好番哂。原來夜咳根本唔關霉菌事,而係天氣同體質問題。只不過霉菌同開冷氣係同期出現,所以就誤以為係原因,其實只係相關。

係呢個時候亦都排到期,睇瑪麗醫院既兒童哮喘科啦,開左啲氣管藥比呀仔聞 (今次係 紫色,長效既),同之前私家醫生開既一樣,但價錢就只係唔洗 $100蚊。不過夏天我減藥到停哂都完全無咳番。

17年9月下旬 (3Y1M) : 夜咳覆發 好彩搵啱中醫

秋天到,又咳番,輾轉係網上睇到 吉鳳霞中醫師講夜咳既文章,講中醫會點樣醫 (佢係中醫咳既專科),於是即刻去睇佢啦。連續食左 4-5 劑中藥,真係好番哂。[同時都有聞氣,但就慢慢減量]

以下一段片係呢位中醫師主講咳嗽:

【杏林在線】(吉醫生講解) 中醫藥治療慢性咳嗽

17年11月中旬 (3Y3M) : 唔再持續夜咳啦

之後感冒完左,可能都會有啲夜咳番,但只要去番吉醫生度,食番幾劑中藥,次次都好快好!

吉醫生睇症真係好詳細,有一次,佢已經開緊藥方,但係我諗起有啲病症補充話佢知,佢即刻又會改藥方。佢真係好認真既好醫生,雖然搬到去屯門咁遠,但係試過搵其他既中醫都係冇佢咁見效。


吉醫生一些健康提示 (本文最底有她的健脾止咳湯水方比我仔飲的):
  • 感冒鼻塞時,可用熱毛巾放鼻前吸氣,可舒緩鼻塞
  • [寒咳] 若咳嗽得多時可放熱薑片, 或用熱薑汁濕毛巾整乾 於後頸下方 (即背部最上位置)
  • [寒咳] (接上) 用藥油擦熱該位置亦可
  • 小兒大多脾胃未發育好,要小心飲食 (大多中醫都診斷我仔肺脾兩虛)
  • 小兒大多發病感冒,都是由於食太多,引致內熱,再起外感。   [19年的復活節學校長假期間, 呀仔數日內有兩三餐食得比平時多 (係街食飯係好味啲),之後就咳 (內熱),過多幾日就燒同埋乞嚏鼻水了 (外感)] [我覺得大概用正常人理解係: 食滯 > 身體用多左能量去脾胃(內熱,, 外表瞓覺時多汗, 此時應食啲涼野, 消滯野) > 體內原本潛藏既病菌就出動 > 感冒]


 相關文章:【轉貼】11個生活高招 阻擊老年癡呆症



8點經驗總結

1 使用醫療用品,一定要睇說明書

聞氣前要搖勻,兒童氣管專科睇完病,仲專登過黎問我有冇搖勻,佢話唔搖等於冇用到!!!我估原因係d藥粒子會沉澱,我冇。。。

2 西醫話係氣管敏感,究竟係乜

敏感係免疫系統對過敏源(食物/氣候/藥物/動植物等)的過度反應,何謂過度?既係大部分人都冇野,而你有野。另一醫生話每日人體有兩個時段氣管會收縮:中午同深夜1-2左右,但日間通常人係醒,瞓晏覺都唔係最熟睡,所以敏感冇咁嚴重。

3 有研究話因為依家d人屋企太乾淨,所以易敏感 (醫生講既)

如果由細到大都係一個好乾淨環境長大,咁到左番學,環境冇咁乾淨,就會容易敏感。 相反,如果由細到大,身體適應左,就會好d。好似有左抵抗力咁。

4 老中醫比較主觀,唔好信哂

第一個睇既中醫係睇開既,係d老中醫,佢好堅持話肺弱,開左d煲既中藥,同佢自家製猴棗散,話食3個月就好。因為呀仔跑一陣就咳,佢就斷定係肺弱。d老中醫因為有經驗,好多時比較主觀。根住再睇另一個人地介紹既老中醫,一睇就話佢瞓得唔好,開藥比佢瞓好d。(其實半夜咳醒就梗瞓得唔好。。。)

相反,再跟住睇左一個後生中醫,佢只係話肺弱,話瞓覺唔知點d氣沖上肺,所以咳(我唔太記得啦)。但就會試藥,唔會話呀仔一定係咁咁咁。我好buy,你只聽下家長講一輪,再摸一摸脈,咁易就肯定到咩事咩?


相關文章:分享一些生活智慧:車廂逃生、心型書簽、密封薯片、銀器回復光澤等等


5 任何藥/食療都唔好長期食

各中醫d藥食左兩三個星期冇乜效,就停左唔食啦。長期食對肝同腎都好傷,因為佢地要排走、過濾多左d化學物質。

6 有病唔好下下即刻食西藥

咳同打乞嚏,係身體既機制,去將肺/氣管既有害物質排出體外。而食西藥,係抑制身體呢d機制。咁會點?咩將d有害物質留左係身體入面囉。較好既方法,係睇下嚴重程度,緊要、影響到休息既(譬如夜晚瞓唔好),先食藥。其實,除左抗生素,傷風既西藥,有徵狀先食就可以,因佢跟本唔會減低你體內既病菌。要減低病菌,係靠你自己,所以最好係有足夠既休息同營養。同埋得閒晒下太陽。
最好係有足夠既休息同營養。同埋得閒晒下太陽。
最好係有足夠既休息同營養。同埋得閒晒下太陽。

7 其他人啱食既食療,你未必啱食,因體質不同

坊間成日有人話,我呀仔飲左乜乜乜好左,除非真係d好一般既方(譬如飲多d水),否則唔好亂試。第一,個病可能根本唔同。第二,每人體質不同,對人地好既,未必啱你。試諗下,同一個溫度,都有d人熱,有d人覺得凍啦。想試的話都最好先問下中醫。


8 唔同時節,唔同體質食唔同水果

之前秋冬天,後生中醫叫我煲雪梨湯加薑比呀仔飲。初春我再問佢,佢話唔啱時節啦。我問佢呀仔食咩生果,佢話呀仔體質較寒,啱食d較「熱」既,如荔枝,芒果等。但梗係唔係叫你多食啦。


9 開冷氣要注意,唔好比啲風直接吹在身上

最好少啲開冷氣啦,就算開,開細風啲,唔好直接吹係人身上,有需要可以加個 冷氣擋板。另外亦可加多一部風扇,使全房冷氣均勻啲。吉醫生曾告訴我,冷氣可以開低溫啲,但要開細風啲。我都係呀仔 2 歳半左右,經吉醫生提點先買左呢塊擋板咋。
冷氣擋板 - 不要直接吹冷氣

***** 2018年11月15日 更新:
比多2個貼士啦,
1) 吉醫生啲藥方如果食完啱, 可以留低, 記錄低子女有何等症狀, 下次有相同情況, 可照執. ***但要注意只適用於病尾/小病/相同季節的藥方****  譬如我當我仔起床/臨瞓/半夜有幾聲咳, 可能兩日如是, 我就會番執

2) 其實秋天乾燥小童易咳, 可煲啲啱季節湯水, 今年我常煲雪梨水(一周1-2次) 比呀仔, 佢好似冇乜點咳, 但我仔寒底, 所以我會加薑煲

都可以分享下我既湯水方 (吉醫生 比的, 啱寒底人):
(點分寒熱? 大致怕凍, 食凍野咳, 食熱氣野唔會喉嚨痛屬寒底, 詳請可看此文)

2-3人分量
雪梨/鴨梨 1-2個 (看大小) 連皮, 去芯去頭尾
薑 2-4 片連皮 (因小兒寒底)
沙參(計約8吋長一條) 約2條
南北杏適量(約1湯匙)
無花果1粒
淮山(計約3吋長) 約4條 (鮮淮山亦可)
黃芪(計約8吋長一條) 約1條 (北芪亦可)
瘦肉(豬展) 約半個拳頭大小

做法:
全部材料洗淨, 淮山要預先用暖水浸最少3小時 (我會放保溫𠁕浸, 浸完既水會有養分用埋黎煲湯), 瘦肉先灼一下(去油), 全部材料連約6-8碗水, 可一齊凍水落, 煲滾後轉細火, 煲約1-1.5小時(新丁煲約1小時打開睇下會唔會乾水), 不用加糖或鹽.
湯渣我同呀仔會食埋雪梨, 南北杏, 無花果, 淮山同瘦肉

(本人實乃廚房新丁, 如有任何錯漏請給指正及多多包涵, 在此分享純粹希望給更加新丁參考)

若覺得這篇文章好,"分享" 給朋友吧!或留個 "Thank You" 呀!
想問經濟、數學?可 按此 到我的面書發問。
想第一時間收到最新文章,可訂閱博客更新 / RSS 

10 則留言:

  1. 我想問下,吉醫生個電話地址可否比我,因為囡囡呢幾個月成日夜咳,同由細到大都勁大汗,想睇下有咩方法可做,thanks

    回覆刪除
    回覆
    1. 唔好意思, 近期太忙, 吉醫相關資料見這: http://bit.ly/BKDr

      刪除
  2. 吉醫生聯系方式可以發俾我嗎,我仔十個月一直喉嚨有痰,不肯食輔食,謝謝

    回覆刪除
    回覆
    1. 吉醫生全名吉鳳霞中醫師,現於屯門就診
      http://www.yot.org.hk/services/cums/

      刪除
  3. 很實用的資料!感謝分享!

    回覆刪除
  4. 可否介紹兒科氣管專科醫生,謝謝

    回覆刪除
    回覆
    1. 請 send email 給我: econmathman@gmail.com

      刪除
  5. 可否介紹西醫🙏🏻🙏🏻

    回覆刪除
    回覆
    1. 請 send email 給我: econmathman@gmail.com

      刪除
  6. sze_ching811122@yahoo.com.hk

    回覆刪除

若想 *收到回覆* 通知,請以 Google 帳號登入,並勾選「通知我」(你依然可選擇 *匿名(唔開名)*) 。

另,Google 偶會審核留言而不能即時顯示,請耐心等候,不用重覆發表。謝謝!

關於作者

Ronald Chik (作者詳情及聯絡, 補習查詢)
教學廿多年,曾在傳統名校伊利沙伯中學、德愛中學任教,學位、副學士、文憑、毅進、中學、日校夜校皆曾任教。現主力湊仔,閒時替人補習,寫網誌,打羽毛球,生活悠遊。

標籤

/生活經濟 (73) '生活智慧 (48) /數學概念 (42) #DSE每年MC詳解 (37) '數碼智慧 (33) '趣味文章 (23) #讀書溫習相關 (20) /數學應用 (19) #S5 (16) //奧數.數學遊戲. (15) '親子 (13) //圖表說故事 (9) #S4 (8) #高小 (8) //老師不教的數學 (8) ''Youtube (7) ''男女關係 (7) #S6 (6) 'Guest Post (6) //MC技巧 (6) #練習 (5) '精選文章 (5) //日曆數學 (5) $\Money and Banking(貨幣與銀行) (4) '經數學堂 (4) //答客問 (4) #S1 (3) #大專 (3) $\Opportunity Cost(機會成本) (3) //計數機 (3) /經濟學習 (3) #P1-3 (2) #S2 (2) $\(Elective) Monopoly Pricing (壟斷定價) (2) $\GDP (2) $\Market Structure (市場結構) (2) ''GIF (2) #2 (1) #3 (1) #K1-3 (1) $.Algebraic Equation in One Unknown(一元一次方程) (1) $.Co-ordinate Geometry(直角座標) (1) $.Measures of Dispersion(離差的量度) (1) $.More About Graphs of Functions(函數圖像的進一步認識) (1) $.Percentage(百分比) (1) $.Permutation and Combination(排列與組合) (1) $.Pi(π)(圓周率) (1) $.Plane Geometry(平面幾何) (1) $.Probability(概率) (1) $.Pythagoras Theorem(畢氏定理) (1) $.Quadratic Equations(二次方程) (1) $.Statistics(統計學) (1) $.Trigonometry (三角學) (1) $\Consumer & Producer Surplus (消費者與生產者剩餘) (1) $\Demand & Supply(供求理論) (1) $\Economic Growth and Development(經濟增長與發展)[選修] (1) $\Externality(界外效應) (1) $\Factors of Production(生產要素) (1) $\Fiscal policy(財政政策) (1) $\International Trade(國際貿易) (1) $\Market Structure(市場結構) (1) '待發佈 (1)

Youtube 頻道