佢嗰塊蛋糕比我嗰塊大!

從前有兩兄弟去餐廳食飯。佢地各自點左一份鐡板牛扒。當侍應上菜時,侍應攞住兩碟牛扒:一碟既牛扒比較大塊,而另一碟既牛扒比較細塊。侍應先比阿哥揀一碟,哥哥毫不猶豫就揀左比較大嗰碟。
細佬好唔滿意,話阿哥無禮貌。

  • 阿哥就問細佬:「如果比你先選,你會揀邊一碟?」
  • 細佬就答:「我好有禮貌,會選比較細嗰碟。」
  • 阿哥回答:「非常好,咁細嗰碟就比你啦!」

過去咁多年黎,數學家不斷研究平均分配呢樣野;不過佢地通常係用蛋糕做例子,而唔係用牛扒。切蛋糕呢樣野背後隱含左唔少既數學原理,甚至有人寫左本書《Cake Cutting Algorithms》,專門研究呢類問題。

講起分蛋糕,先考考大家一條問題:
假設而家你要將個生日蛋糕分比個小朋友,由於時間關係,你只可以切3刀(我承認呢個理由有D古怪,不過算啦!)。你要點樣切,而且只能沿直線切3刀,先可以平均將蛋糕分成8份呢?


無錯,就好似下圖咁,由上而下切兩刀,再橫向切過蛋糕既中間。




IQ題講到底都係IQ題,如果係真正既生日蛋糕,上面嗰層應該會有糖霜同忌廉。用上面嗰種切法,我相信無人會希望分到下面嗰層。所以一般而言,大家都會咁分一個正方形既蛋糕:首先將蛋糕對半切開,然後再分別對半切開。用呢種分法,切2、4或者8塊蛋糕都好簡單。不過,如果人數係奇數呢?假設你要分蛋糕比7個人,你又可以點切,先平均切出7件同量大小既蛋糕呢?

以下呢種切法,不論係分比幾多個人都適用:
假設我地有一個正方蛋糕,要分比7個人。
1) 先將正方形既周邊劃分為7個等長既部份,每部份X單位長,並記低位置(a-g)。(參考下圖)
2) 然後揾出蛋糕既中心點(M),由記號開始沿直線切到中心點。















呢個做法可以分倒7份相同份量既蛋糕,而每份蛋糕都有糖霜同忌廉。各位讀者不妨證明一下佢地既分量點解相同,而且只需要用到小學既數學知識。

不過,如果你想分蛋糕比小朋友,呢個方法係無用既,因為小朋友一定會斤斤計較蛋糕分量係唔係完全一樣。既使你用上面個方法分蛋糕,佢地都唔會明白點解蛋糕分量相同;就算你用數學證明左比佢地睇(前提係:佢地聽得明),佢地都會話:都係人地嗰塊睇落大D!咁我地應該點分蛋糕呢?

假設媽媽焗左個長方形既蛋糕比上文中既兩兄弟(補償細佬既不公平待遇?!)。媽媽可以用以下方法分蛋糕比佢兩兄弟,令佢兩個都覺得完全公平:

1) 將刀交比細佬,比佢將蛋糕分成兩等份。
2) 分左蛋糕後,由阿哥先揀一塊蛋糕,剩番嗰塊就歸細佬所有。

有人叫呢個方法做「我切你選」。用呢個分法,細佬會認為2塊蛋糕大小相同;而阿哥就會認為佢選嗰一份比較大塊。所以兩兄弟都會滿意呢種分法。

但係如果你要分蛋糕比3個小朋友呢?1994年,波蘭數學家團體成員之一既Hugo Steinhaus提出左一個三人公平分配蛋糕既方法。方法被稱為「修減法」(trimming)。
方法如下:

假設要分蛋糕比A、B同C三個小朋友。
1) 由A將蛋糕切成α同β兩份,α佔成個蛋糕既1/3,而β佔2/3。

2) A將α交比B修整。如果B認同α佔成個蛋糕既1/3,佢無須理會。如果B認為α大於1/3,佢可以將呢塊蛋糕修成佢認為既1/3。不論B有無修整蛋糕,我地都叫呢塊蛋糕做α*。α*唔係等於α,就係細過α。

3) B將α*交比C,由C決定要唔要呢塊蛋糕(α*)。

4) 如果C接受α*:
咁A同B將剩番既蛋糕(α*同B在α中切落既薄片)用「我切你選」方法平分。

如果C唔接受α*,而且B修減過α:
B被分配α*,A同C用「我切你選」方法平分剩低既蛋糕(包括薄片)。

如果C唔接受α*,而B無修減過α:
A被分配α*,而B同C用「我切你選」方法平分β。

其實呢類方法除左可以分蛋糕外,仲可以分其它野。例如分配土地、分遺產等。《數學可以羅馬?!20個數學世界裡的奇妙謎題》p.185 中提及到一個以上述方法分配土地的例子。

註:本文參考自《為何公車一次來三班?》和《數學可以羅馬?!20個數學世界裡的奇妙謎題》

沒有留言:

張貼留言

若想 *收到回覆* 通知,請以 Google 帳號登入,並勾選「通知我」(你依然可選擇 *匿名(唔開名)*) 。

另,Google 偶會審核留言而不能即時顯示,請耐心等候,不用重覆發表。謝謝!

關於作者

Ronald Chik (作者詳情及聯絡, 補習查詢)
教學廿多年,曾在傳統名校伊利沙伯中學、德愛中學任教,學位、副學士、文憑、毅進、中學、日校夜校皆曾任教。現主力湊仔,閒時替人補習,寫網誌,打羽毛球,生活悠遊。

標籤

/生活經濟 (73) '生活智慧 (48) /數學概念 (42) #DSE每年MC詳解 (37) '數碼智慧 (33) '趣味文章 (23) #讀書溫習相關 (20) /數學應用 (19) #S5 (16) //奧數.數學遊戲. (15) '親子 (13) //圖表說故事 (9) #S4 (8) #高小 (8) //老師不教的數學 (8) ''Youtube (7) ''男女關係 (7) #S6 (6) 'Guest Post (6) //MC技巧 (6) #練習 (5) '精選文章 (5) //日曆數學 (5) $\Money and Banking(貨幣與銀行) (4) '經數學堂 (4) //答客問 (4) #S1 (3) #大專 (3) $\Opportunity Cost(機會成本) (3) //計數機 (3) /經濟學習 (3) #P1-3 (2) #S2 (2) $\(Elective) Monopoly Pricing (壟斷定價) (2) $\GDP (2) $\Market Structure (市場結構) (2) ''GIF (2) #2 (1) #3 (1) #K1-3 (1) $.Algebraic Equation in One Unknown(一元一次方程) (1) $.Co-ordinate Geometry(直角座標) (1) $.Measures of Dispersion(離差的量度) (1) $.More About Graphs of Functions(函數圖像的進一步認識) (1) $.Percentage(百分比) (1) $.Permutation and Combination(排列與組合) (1) $.Pi(π)(圓周率) (1) $.Plane Geometry(平面幾何) (1) $.Probability(概率) (1) $.Pythagoras Theorem(畢氏定理) (1) $.Quadratic Equations(二次方程) (1) $.Statistics(統計學) (1) $.Trigonometry (三角學) (1) $\Consumer & Producer Surplus (消費者與生產者剩餘) (1) $\Demand & Supply(供求理論) (1) $\Economic Growth and Development(經濟增長與發展)[選修] (1) $\Externality(界外效應) (1) $\Factors of Production(生產要素) (1) $\Fiscal policy(財政政策) (1) $\International Trade(國際貿易) (1) $\Market Structure(市場結構) (1) '待發佈 (1)

Youtube 頻道