經數樂園－學習變有趣～[找補習?]: 10 件你出電話連數據Plan之前應該要知道的事 (2019 年)

10 件你出電話連數據Plan之前應該要知道的事 (2019 年)

(現正更新中, 預計12月30日前完成)

依家香港差唔多每人都有兩部電話，但係我識一d朋友佢地仲比緊成 300蚊電話，貴到丫！所謂「知識就是力量」，你知多d，就可以比少啲囉。

1。留意計畫數據的上網速度

我有朋友告知啱啱出左 Smartone $68 電話連無限 3G 數據（見以下連結），仲要話無合約，我心諗有冇咁荀呀？咁我有日行過旺角又見到有Smartone擺街就問下啦，結果發現原來係限速架，得 384kbps 咋，即係幾慢？禽日我幫朋友裝個Whatspp 時用左成2分鐘呀。。。簡直燃燒我既生命呀！

個Sell屎話係 3G 呀，最初期 3G 速度係咁上下架，嘩，咁都得？3G 現時最高速可以去到 7.2 甚至 14.4Mbps，1M = 1000kb，咁佢 Smartone 呢個 Plan 速度有幾快條數好易計啫！呢啲 Plan 係比啲淨係玩 Whatsapp 既人架(好多女生都係啦)。不過 Smartone 都算有人性，唔洗簽約，等你頂唔順可以隨時走。

數碼通推出 3G 無限上網計劃，免簽約月費 $68，限速 384Kbps
http://unwire.hk/2012/08/26/smartone-unlimited-3g-data-plan-384kbps/news/

2。出「街Plan (街霸)」可以做到一啲門市冇的荀價月費

其實應該好多人都知架啦，
係各電訊商門市出 Plan，冇係街出（街霸）咁掋。點解會咁？因為電訊商又要搶客，又想賺到盡。呢種情況係價格歧視(Price Discrimination)囉，歧視d資訊不足人仕。仲有如果你『帶冧把過台』就仲平。

電訊商門市出 Plan，冇係街出（街霸）咁掋

3。電話儲值卡都可以『帶冧把過台』

好多時電訊商會比優惠去搶客。若你純想開個新冧把，但又想有優惠，你只要去買張電話儲值卡就得嘞。但記住未到轉會日期之前，唔好「用乾」張卡喎！否則你張卡就打柴（個冧把會冇左）帶唔到架啦。

仲有！知唔知電話卡邊度全港最平？。。。登登，係有「香港矽谷」之稱既－深水埗鴨尞街，啲電話卡我估應該係電訊商平價拆比佢地（谷大表面既市場佔有率），全部都差唔多做到半價甚至更平呀，舉例，一張原價 $48 既 PCCW 儲值卡，佢地只賣 $18-25 蚊咋。對果d耐唔耐就爆分鍾既人就最啱啦！記住格下價先呀！

深水埗鴨尞街電話卡超平

對果d耐唔耐就爆分鍾既人就最啱啦！

4。留意計畫是否當用過左某個 Data 用量之後要限速（公平用量條款）

話說我個 3台既電話Plan 快到期滿約（是的！我是用濳水台3 的，純貪佢平，$81全包 2100分鐘再加 200Mb數據，唔睇片都幾夠用，仲有3影院，逢星期三免費睇場戲，啱哂我呢d半退休人士），有日佢地打黎叫我續約，所有野不變，但冇左3影院，而數據佢就話任用。任用？？？我呢d細個阿媽教到大，邊有咁多正妹唔著衫週街走？新聞都勁賣公平使用原則，我於是問佢：

我：「無限即係幾多丫？」
客服：「先生，係無限用架！」
我：「（嬲嬲地）無限咁即係幾多呀？」
客服：「無上限架！但用多過 2Gb之後要根據公平使用原則要限速呀」

其實呢個係德政，事關好多人（包括鄙人）都一定試過用爆 Data，用佢呢隻 Plan 就唔會話用爆啦。

5。用爆 Data 可以買點數

用爆 Data 張單爆貴點算？如果真係爆好多，我有朋友試過要比成千銀！呢個時候，記住打去客服嘈佢呀，通常佢都會比番個折你既。

如果係喺該月未截數之前就仲簡單，可以打去問客服，原來有臨時 Data 數據買（3仔咋，其他唔知，不過都可以試試丫？），我果次爆左200Mb左右，結果大概比左 $250大元找左條數，如果比正價逐Kb計就要成$1000蚊丫！至於引致我爆Data兇手，應該係重裝機後，Google Play 自動更新左好多 Apps，真大意，平時我一定會關哂所有自動更新，或者 set 做只用 wi-fi 下載。

其實大家應該裝番個 App (Search: Data Usage) 監察住你 Data 用量（Android 4.0有內置監察選項）。

6。記住落實簽單前，問Sell屎有冇其他額外著數

佢地為左簽成張單，好多時會有現金卷送架！

7。即使係喺門市，都可以試下問佢地有冇啲平 Plan

好似我依家用緊一個3既Data Plan，係佢地冇公佈出黎，係要問先會有架：$51，無限1Gb（即係先前第4點所講果隻呀）。

我點知有呢d Plan？哈哈，知識就是力量，睇多d電腦雜誌囉！

8。連機上台 Plan 點計掋唔掋

好多人唔識計果d連機(iPhone等)Plan究竟掋唔掋，其實好簡單計少少數就得啦。
計法是，先計總款額，減去iPhone二手回收價，再去計每月實質月費：

好似以上計劃1咁，其實我都夠用，16Gb上台價$3,660，合約期24個月。
月費($138+36+12)*24=$4464，再加機價$3660
2年合共成本為4464+3660=$8124，現時回收價$6200 (http://www.iphoneprice.hk)，淨月費=8124-6200=$1924
所以淨月費為 1924/24 = 每月$80.17。
同我現時月費一樣（見上面第4點），但我齋續台Plan反而仲多Data用！

以後你自己識計啦？

9。未滿約都可以帶冧把過台架

若未滿約，但又有d荀Plan想Join，可以照同Sale屎講，佢地其實可以幫你帶住去張臨時卡（新冧把），到你舊約滿後，就可以將呢個 Plan 轉番去你原有冧把啦。

10。Whatsapp 其實可以用不同佢自己既冧把既。

方法是：
1）先用冧把A(你想表示於人前的冧把)的 sim 卡開 Whatsapp，用來認證電話冧把（呢張卡其實有冇 Data 都得，因為可以用 wifi 下載 Whatsapp）。
2）之後換一張你想用的 Data 卡入去該部電話（或平板），Whatsapp 係唔需要你再認證的。
3）若你之後要重裝你的 Android，你需要再輸入電話冧把，便輸入你在步驟1輸入的冧把（你想表示於人前的冧把）。

iOS 我就唔知得唔得啦。

以上10點僅為「拋磚引玉」，希望各位有好點子的話留個言，等大家可以係大財團手指罅度，攞番幾蚊。。。