【數學題】66無窮

來源：經數學堂

原文按此

一個長達70年 耗資2,000萬美元的研究 之驚人發現 (Guest Post)

哈佛大學醫學部 (Harvard University Health Services) 喺1938起做一個研究，花咗超過70年嘅時間，耗資2,000萬美元，研究268名該大學嘅男生。呢個研究緊貼呢班男生嘅人生起跌，當中佢哋經歷過戰亂時期，工作博殺期，戀愛求偶期 (包括埋結婚，離婚，再婚)，而至後嚟嘅中年及晚年期。呢個研究一啲都唔簡單，研究範圍牽涉佢哋嘅個人IQ，生活飲食習慣，家庭關係等，研究員兼且每兩年就邀請佢哋面談或做問卷，亦定期諮詢佢哋嘅醫生，了解佢哋嘅健康概況。

呢個研究其實問一個好簡單不過嘅問題 – “What makes a good life?” (點樣有一個好嘅人生？) 結果發現幾樣嘢：
- 酗酒可以毀你一生，係導致離婚嘅主因，亦能引致各樣精神/心理嘅病以及抑鬱
- IQ (智商) 唔係決定你賺幾多錢嘅因素，普通智商 (IQ: 110-115) 同高智商 (IQ: 150以上) 嘅人賺錢能力都係差唔多
- 人際關係直接影響一個人嘅晚年健康狀況同埋心境

研究負責人George Vaillant教授發現同人有好關係 (warm relationship) 嘅人會係著數啲嘅，而特別同阿爸阿媽嘅關係尤其影響深遠：

 - 擁有關愛自己嘅阿媽嘅人，比起一個擁有冷酷無情嘅阿媽嘅人，平均一年賺多8萬7千美金 (約68萬港元)
- 細個同媽媽關係好嘅人無咁容易得到腦退化症或癡呆症 (dementia)
- 阿媽同阿仔嘅關係會正面影響到佢將來事業上嘅成就
- 阿爸同阿仔嘅關係會正面影響佢晚年嘅生活質素，並能減低成年時嘅憂慮

圖為George Vaillant教授

Vaillant教授收尾嗰陣加多一句，“Happiness is love” (開心就係愛)。

筆者睇完呢個研究嘅結果，好有反省，雖然研究嘅對象主要係男性，但相信父母同女兒嘅關係亦會有類似嘅影響。所以一方面自己勉勵自己，亦想奉勸大家，多啲珍惜同埋好好善用同家人一齊嘅時間。筆者更已經規定自己，每星期有半日左右嘅時間，唔回覆Whatsapp，唔上Facebook之類，專心而專注咁同家人一齊，好好享受家庭嘅生活。咁你打算點呢？ 作者Andrew Choy為教會牧師，同時兼營網上手機商店，已移居澳洲多年，先後取得工商學學士，神學學士，文學碩士等學位，現正攻讀博士課程，對新科技，投資，輔導及個人成長之題目甚有興趣。