究竟 Multi-tasking (多工作業)，抑或係 Single-tasking (單任務) 會令你工作得更有效率呢？ [Andrew Choy]

我們經常都會多工作業，究竟好定唔好呢？

今時今日，事事講求工作效率，公司為咗要節省資源，要每一位員工擔當多項工作；學校嘅老師亦要兼顧教學及學校嘅行政，更要兼負招生嘅工作。結果不單止兩頭唔到岸，疲於奔命，亦令眾多已為人父人母嘅打工仔女喪失親子嘅時間，健康亦出現問題。另外，每個都市人都擁有嘅個人電腦，平板以及智能電話等，亦講求 multi-tasking，等用家一面 whatsapp，睇片，打機，另一面覆 email，睇網頁，代價就係耗電量高，手機亦需要雙核甚至四核，先至達到滿意嘅效果。咁究竟 multi-tasking，抑或係 single-tasking 令我哋做事更有效率呢？

筆者想以一個約100年前嘅事蹟同大家探討這個問題。
1911年，有兩隊探索隊差不多同時出發去南極（South Pole），佢哋都好想成為人類第一隊踏足南極嘅人。一隊係由挪威（Norway）探險家 Roald Engelbregt Gravning Amundsen（羅爾德·亞孟森，以下簡稱 Amundsen）帶領嘅，另一隊係由英國（Britain）探險家 Robert Falcon Scott（羅伯特‧史考特，以下簡稱Scott）帶領嘅。

羅爾德·亞孟森在南極的照片

Amundsen 比 Scott 早 11日出發，結果佢帶領嘅隊伍成為第一隊到達南極嘅人，佢哋並且能夠按出發前嘅計劃於準確嘅日子，整隊人無誤而且能齊齊整整咁返去出發地（點解我咁強調佢哋係齊齊整整呢？睇落去就知喇...）。Scott 雖然遲咗 11日出發，結果佢哋一共遲咗34日先到達南極，意思即係佢哋一共多花23日嘅路程先抵達南極，更弊嘅係，佢哋整隊人喺回程途中，竟然 "全軍覆沒"，喺饑寒交迫嘅情況下先後喪生。

歷史話俾我哋聽，兩隊人其實面對差唔多同樣嘅環境，差唔多同樣嘅情況及天氣，但係點解一隊人成功？另一隊卻失敗？後世嘅人嘗試分析佢哋成敗嘅因素時，得出好多唔同嘅原因，有人從領導學（leadership）嘅角度去探討兩隊人成敗得失嘅主因，認為關鍵就係 multi-tasking 同 single-tasking 嘅分別。

羅爾德·亞孟森

Amundsen 只有一個目標（single-tasking），佢要成為第一個去南極嘅人，佢嗰隊探險隊喺途中只影咗約 10張嘅相片。而 Scott 佢哋除咗係想成為第一個去南極嘅人之外，佢哋仲有其他目的（multi-tasking），包括做科學研究，除咗喺途中影咗 2,000張相片，亦都搜集咗好多各式各樣大大小小有研究價值嘅物料，以致虛耗隊員嘅精力，耽誤寶貴嘅時間，無法成為人類歷史第一隊踏足南極嘅人，兼且賠上寶貴嘅生命。


從中，我哋睇到其實要有效率，工作嘅人必須要一心一意，全力以赴咁做好手頭嘅工作。反而，三心兩意，做吓依樣又搞下嗰樣，往往失卻咗工作嘅效率，唔怪得我哋咁多朋友成日要OT到半夜囉。

• 客席博客：Andrew Choy
• 作者為教會牧師，同時兼營網上手機生意，已移居澳洲，先後取得工商學及神學雙學士，文學碩士等學位，現正攻讀博士課程，對新科技，投資，輔導及個人成長之題目甚有興趣。
• 你也想成為客席博客嗎？請聯絡 econmathman@gmail.com。