中銀百週年紀念「炒」，論機會成本

香港，果然係靠做貿易起家！

當我仲係到担心緊今次會唔會好似上次「渣打150週年紀念鈔」咁，「冇價又冇市」既時候，啲長者炒家就已經攻陷咗一間又一間既中銀分行啦。


幾日排隊賺半個月人工

從新聞片段可見，
情況就況如世界未日來臨，大家瘋狂搶買糧食咁。充分表現出我地香港人「執輸行頭慘過敗家」既「香港精神」。

但係，你有冇去搶丫？若果有，你就好啦！呢頭由銀行攞完紀念鈔($150)，果頭就即刻有人用幾倍價錢同你買喎($700-$1400)。我就有朋友同我講，佢識人嘅老婆頭兩日都每日去排隊，結果每日都執到$1200($1500收兩張)，已經賺左3日啦，佢手上仲有跟住兩日嘅籌！即係話，如無意外，佢跟住嗰兩個籌，應該可以每個都幫佢「創造」到$1200嘅價值！咁樣計法，佢今年咩由中銀代替左「正苦」派咗6000蚊比佢囉！直頭好賺過炒iPhone啦！我阿媽仲勁，佢識人(可惜唔係佢本人)有朋友係馬鞍山中銀頭兩日都去排，每次都可以「得道輪迴」到，即係同日買完第一次番轉頭仲可以排到隊再買到第二次！咁真係唔怕輪迴多幾次呀～

但我前日打羽毛球嘅時候就有個波友話啦：「唏！我先冇咁得閒去排隊啦！」


寧願打波都唔去排隊買紀念鈔？

「咁你又得閒嚟打波？」我心諗！

係喎其實，當然，「排隊炒紀念鈔」表面成本(Explicit Cost)就係$150啫，但既然你同我又冇去排，我既波友又冇去排，咁即係對佢地嚟講，「排鈔」嘅隱含成本(Implicit Cost)相當高。隱含成本是你選擇做一件事情暗藏既要犧牲嘅價值。

經濟學最基本嘅其中一個概念是：你所有選擇去做的事，必然是「(其)價值」高於「(機會)成本」的。而機會成本側包括兩類成本(表面及隱含)之和。

電視新聞見到，頗大部分排隊的人均是公公婆婆C9(他們主宰住大部分各式各樣的排隊活動！)。他們選擇去做(排隊)，因為一般公公婆婆C9都好多時間，亦冇乜特別野去做，佢地排隊嘅「機會成本」好低。即係話，佢地若果唔去排隊，原本會揀去做嘅嘢(去公園坐、或茶樓飲茶、或打麻雀)對佢地嘅價值都好低，去排隊犧牲唔大。


機會成本控制你的決定

同樣，你不會做「機會成本」高於「價值」的事。上文所述的「波友」，據我所知，差不多日日都打波，打波對佢嘅價值肯定很高。即係話，若果有得打波，佢寧可放棄好多嘢，包括放棄去排隊「炒鈔」會賺到嘅錢。所以對佢嚟講， 「炒鈔」嘅價值(賺到嘅錢)，少於其機會成本(「打波」對佢嘅價值)，所以就冇去排嘞。

不過，我相信佢一定係錯估咗「炒鈔」嘅價值！特別係若果佢知道埋我阿媽馬鞍山朋友嘅「輝煌戰績」之後，佢一定唔會話：「唏！我先冇咁得閒去排隊啦！」哈！