精選文章

2012-2017 HKDSE Math 歷屆數學不同級別(Grade)所需分數 cut off 及其分析

本文目的:
坊間 cut-off 出處係邊?準嗎?啲 cut-off 原貎(原始數據)係點?真實 cut-off 係幾多?啲 cut-off 數據,有否反映出其他資訊(如考卷深淺變化)? 本文希望能為此提供答案。(如有問題請留言
(一) 坊間 Cut-off 來源:某大討論區 網上所有 Cutoff 資料,其實全出自某學生討論區,佢地每年都收集分數 (覆卷考生無私交出 check 卷結果),再整理 得出大約既 Grading 分數*,使莘莘學子得益。
(*係大約咋,下文會講點解係大約,同應該點用呢啲數據)

(點解考試局唔公開呢啲資料呢?好多外國公開試都有咁做。)
(唔唔,應該係,除非唔係。)

阿仔半夜久咳(2Y2M-7M), 霉菌? 肺弱? 終於搵啱醫生, 經歷分享及 8個健康心得 (18年4月28日更新)

咳左將近半年(半夜咳)。終於好番,原因原來係霉菌。
小朋友夜咳好困擾,特別係一晚咳醒幾次的話,無論大人細路都瞓得唔好
18年4月28日更新:係17年4月尾,轉入夏天後,呀仔既夜咳好番哂。原來唔關霉菌事,係天氣同體質問題。

----
好多細路都會咳,特別係番左幼稚園之後,d菌傳黎傳去。我呀仔,亦咳左將近半年(半夜咳)。終於好番,原因原來係霉菌。分享呢篇文希望可以幫到同樣經歷既家長同小朋友。


每晚半夜咳 近半年都唔好 睇左 5, 6 次中西醫生

約16年10月底(2Y2M)夜咳遍尋中西醫不果

阿仔感冒完左之後,每晚半夜咳,咳醒2-3次,每次連續咳10-20秒左右,冇乜痰既,亦會繼續瞓番。跑步一陣亦都會氣喘咳。但日間咳就好少,只有一聲半聲。見日間冇點咳,諗住食中藥調理下。

睇咗3個中醫(尖沙咀,太子, 石塘咀) 1個西醫都冇效,中醫話佢肺弱,食咗好多中藥、猴棗散,保嬰單,都冇好轉,都係每晚咳醒幾次,好在日頭冇點咳。

約17年1月底(2Y5M)聞哮喘藥

見半夜咳咗成兩三個月啦,再睇兒科西醫(美孚),話氣管敏感,開青蛙仔(氣管敏感藥 Singulair),食左一星期冇效,轉睇一成人胸肺科醫生(之後先知青蛙仔要食3星期先見效)。


胸肺科醫生比佢聞氣(哮喘病人聞果類)
胸肺科醫生開的抗氣管敏感噴劑
胸肺科醫生比佢聞氣(哮喘病人聞果類,見圖),兩支,一支有類固醇(醫生話長用會有副作用影響生長)。幾日後開始冇咳,聞左兩星期,減藥量,又咳返,比之前咳多左添,最嚴重果時一晚咳醒三四次。(類固醇唔可以長期聞,醫生話可能會減慢發育)


搵到兒童氣管專科好醫生「病因可能係霉菌」

17年3月中旬(2Y7M)轉醫生終於停咳

輾轉搵到一個兒童氣管專科(好好人,好細心),開藥同胸肺科一樣,但劑量較輕(For小朋友,原來之前開既係大人量!)。佢開既劑量,話有哂研究可以長期聞冇副作用,係之前胸肺科量既 1/4。睇哂阿仔耳鼻喉,聽埋肺都冇事,安心d。

問點解咳,佢話氣管敏感,問阿仔同父母有冇過敏體質(食物、藥物敏感、濕疹),都冇。問係咪塵蟎,係(晒過床褥),另有人床邊牆有霉菌(見圖)而咳,搬屋後好左。呢個真係黎睇佢既最大得著。


牆身發霉原來有可能引起呼吸道疾病
我家小朋友床邊既牆,就係有呢d咁既霉點,快d睇下你屋企有冇?
我計一計條數,十月停冷氣(可抽濕) 就開始咳,回家看床邊牆亦有輕微嘅霉,即刻清潔好(上網搵話用酒精抺,之後再加「防霉勇士」再抺),聞左氣一星期,夜咳逐漸減少,一星期後冇再咳啦。


17年4月中旬(2Y8M)停藥又咳番 試身體過敏反應

點知停聞氣管藥約一星期,呀仔又咳番!於是再睇另一個兒童氣管科專科醫生(都係由將軍澳既兒科醫生介紹),又有兩點新發現:
  1. 原來有測試可看有否塵蟎過敏。呀仔試左,冇野喎。
  2. 佢話有d細路會咁樣咳,咳到5-6歲。。。

冬天咳夏天好每年覆發

17年5月初(2Y9M)夏天到夜咳好 排到期瑪麗兒童哮喘科

轉入夏天後,呀仔既夜咳自自然然完全好番哂。原來唔關霉菌事,而係天氣同體質問題。只不過霉菌同冷氣係同期出現,所以就誤以為係原因,其實只係相關。


係呢個時候亦都排到期睇瑪麗醫院既兒童哮喘科啦,開左啲氣管藥比呀仔聞,同之前私家醫生開既一樣,但價錢就只係唔洗$100蚊。不過夏天我減藥到停哂都完全無咳番。

17年9月(3Y1M)夜咳覆發 好彩搵啱中醫

秋天到,又咳番,展轉係網上睇到吉鳳霞中醫師講夜咳既文章,講中醫會點樣醫(佢好似係中醫咳既專科),於是即刻去睇佢啦。連續食左 4-5 劑中藥,真係好番哂。[同時都有聞氣,但就慢慢減量]

17年11月中旬,呀仔就再冇持續夜咳啦。之後感冒完左,可能都會夜咳番,但只要去番吉醫生度,食番幾劑中藥,次次都好快好!

吉醫生睇症真係好詳細,有一次,佢已經開緊藥方,但係我諗起有啲病症補充話佢知,佢即刻又會改藥方。佢真係好認真既好醫生,雖然搬到去屯門咁遠,但係試過搵其他既中醫都係冇佢咁見效。




 相關文章:【轉貼】11個生活高招 阻擊老年癡呆症



8點經驗總結

1 使用醫療用品,一定要睇說明書

聞氣前要搖勻,兒童氣管專科睇完病,仲專登過黎問我有冇搖勻,佢話唔搖等於冇用到!!!我估原因係d藥粒子會沉澱,我冇。。。

2 西醫話係氣管敏感,究竟係乜

敏感係免疫系統對過敏源(食物/氣候/藥物/動植物等)的過度反應,何謂過度?既係大部分人都冇野,而你有野。另一醫生話每日人體有兩個時段氣管會收縮:中午同深夜1-2左右,但日間通常人係醒,瞓晏覺都唔係最熟睡,所以敏感冇咁嚴重。


3 有研究話因為依家d人屋企太乾淨,所以易敏感 (醫生講既)

如果由細到大都係一個好乾淨環境長大,咁到左番學,環境冇咁乾淨,就會容易敏感。 相反,如果由細到大,身體適應左,就會好d。好似有左抵抗力咁。


4 老中醫比較主觀,唔好信哂

第一個睇既中醫係睇開既,係d老中醫,佢好堅持話肺弱,開左d煲既中藥,同佢自家製猴棗散,話食3個月就好。因為呀仔跑一陣就咳,佢就斷定係肺弱。d老中醫因為有經驗,好多時比較主觀。根住再睇另一個人地介紹既老中醫,一睇就話佢瞓得唔好,開藥比佢瞓好d。(其實半夜咳醒就梗瞓得唔好。。。)

相反,再跟住睇左一個後生中醫,佢只係話肺弱,話瞓覺唔知點d氣沖上肺,所以咳(我唔太記得啦)。但就會試藥,唔會話呀仔一定係咁咁咁。我好buy,你只聽下家長講一輪,再摸一摸脈,咁易就肯定到咩事咩?



相關文章:分享一些生活智慧:車廂逃生、心型書簽、密封薯片、銀器回復光澤等等



5 任何藥/食療都唔好長期食

各中醫d藥食左兩三個星期冇乜效,就停左唔食啦。長期食對肝同腎都好傷,因為佢地要排走、過濾多左d化學物質。


6 有病唔好下下即刻食西藥

咳同打乞嚏,係身體既機制,去將肺/氣管既有害物質排出體外。而食西藥,係抑制身體呢d機制。咁會點?咩將d有害物質留左係身體入面囉。較好既方法,係睇下嚴重程度,緊要、影響到休息既(譬如夜晚瞓唔好),先食藥。其實,除左抗生素,傷風既西藥,有徵狀先食就可以,因佢跟本唔會減低你體內既病菌。要減低病菌,係靠你自己,所以最好係有足夠既休息同營養。同埋得閒晒下太陽。
最好係有足夠既休息同營養。同埋得閒晒下太陽。
最好係有足夠既休息同營養。同埋得閒晒下太陽。

7 其他人啱食既食療,你未必啱食,因體質不同

坊間成日有人話,我呀仔飲左乜乜乜好左,除非真係d好一般既方(譬如飲多d水),否則唔好亂試。第一,個病可能根本唔同。第二,每人體質不同,對人地好既,未必啱你。試諗下,同一個溫度,都有d人熱,有d人覺得凍啦。想試的話都最好先問下中醫。


8 唔同時節,唔同體質食唔同水果

之前秋冬天,後生中醫叫我煲雪梨湯加薑比呀仔飲。初春我再問佢,佢話唔啱時節啦。我問佢呀仔食咩生果,佢話呀仔體質較寒,啱食d較「熱」既,如荔枝,芒果等。但梗係唔係叫你多食啦。

***** 2018年11月15日 更新:
比多2個貼士啦,
1) 吉醫生啲藥方如果食完啱, 可以留低, 記錄低子女有何等症狀, 下次有相同情況, 可照執. ***但要注意只適用於病尾/小病/同季節的藥方****  譬如我當我仔起床/臨瞓/半夜有幾聲咳, 可能兩日如是, 我就會番執

2) 其實秋天乾燥小童易咳, 可煲啲啱季節湯水, 今年我常煲雪梨水(一周1-2次)比呀仔, 佢好似冇乜點咳.

都可以分享下我既湯水方(啱寒底人):
(點分寒熱? 大致怕凍, 食凍野咳, 食熱氣野唔會喉嚨痛屬寒底, 詳請可看此文)

2-3人分量
雪梨/鴨梨 1-2個 (看大小) 連皮, 去芯去頭尾
薑 2-4 片連皮 (因小兒寒底)
沙參(計約8吋長一條) 約2條
南北杏適量(約1湯匙)
無花果1粒
淮山(計約3吋長) 約4條 (鮮淮山亦可)
黃芪(計約8吋長一條) 約1條 (北芪亦可)
瘦肉(豬展) 約半個拳頭大小

做法:
全部材料洗淨, 淮山要預先用暖水浸最少3小時 (我會放保溫𠁕浸, 浸完既水會有養分用埋黎煲湯), 瘦肉先灼一下(去油), 全部材料連約6-8碗水, 可一齊凍水落, 煲滾後轉細火, 煲約1-1.5小時(新丁煲約1小時打開睇下會唔會乾水), 不用加糖或鹽.
湯渣我同呀仔會食埋雪梨, 南北杏, 無花果, 淮山同瘦肉

(本人實乃廚房新丁, 如有任何錯漏請給指正及多多包涵, 在此分享純粹希望給更加新丁參考)

若覺得這篇文章好,"分享" 給朋友吧!或留個 "Thank You" 呀!
想問經濟、數學?可 按此 到我的面書發問。
想第一時間收到最新文章,可訂閱博客更新 / RSS 

關於作者,及相關文章

Ronald Chik (植Sir)

港大統計碩士及經濟學士。春風化雨接近二十年, 學位, 副學士, GCSE, 文憑, 毅進, 中學, 日夜校皆曾任教。現職HKMA統計及經濟兼任講師,替少量學生補習,閒時最愛打羽毛,生活寫意悠遊。

留言

Youtube 頻道